الاثنين، 30 مايو 2011

اسمى الجديد

وانا لسه بنزف
فى ناس تقول اسمى شهيد
وفى ناس تعاند عند الحديد
وكمان تعيد
لأ مش شهيد

وانا لسه بنزف
روحى مفارقتش الحياه
هدفى فى وسط الزحمه تاه
والناس تعيد
لأ مش شهيد

وانا لسه بنزف
سابونى اهلى وراحوا يتخانقوا بعيد
وانا لسه بهمس واقول واعيد
حبيب لمصر ... اسمى الجديد
والناس تعيد
لأ مش شهيد

وانا لسه بنزف
شفت حبيبتى وسط الزحمه ملهوفه
عليا تجرى صرختها معروفه
ودمعوها جايزه ليا وموصوفه
والناس تعيد
لأ مش شهيد

ولسه بنزف
و بدموعها تروينى حنان الام
وفى حضنها لحظات مشيلتش هم
روحى استرحت فاضت ووقف الدم
وبحرقه صرخت .... وفضلت تعيد
ابنى الشهيد

ليست هناك تعليقات:

إرسال تعليق