الخميس، 25 أغسطس 2011

بهزئك ... طب ياللا ثور

يا شعب يعشق ديكتاتور
يانص ثورة ونص تور
طالب لجام ليه حضرتك !!!!؟؟
عشان ما تجرى
ركب ماتور

وليه بتركن جنب حيط
عشان تفاجئك ساقيتك
ترجع تدور

انت عبيط
ولا العباطه صنعتك
عايز تعيد
كرّه جاسوس يستعبدك
ويمرمطك ... ويعذبك
ويخلى اسمك شغلتك
اصل انت تور

طب حريتك
ومات فداها الف شاب
ماتستهلش تبوس ايديهم
ما هو دول حبور
دايس برجلك دمهم
وعلى حقهم
عاوز تجور

دول طلبوا حريه لسعادتك
وانت بغباوتك
عاوز تدور
فى ساقيه فاضيه
ماتجيبش جاز
ولا حتى مايه
اصل انت تور

طب بس ليه
رافض تصدق ان انت واطى
اديك بتقرا بعنيك إهانتك
وبراضو راضى

هو انت مثلاً
مخلوق على هيئة حمار
فين معدنك

وربك انت
يوم اما خلقك
كرمك

طب نعمل ايه
فى شعب مش عاوز يعيش
حر الاراده

ماهو اصله واخد عل الحشيش
بلط بلاطه

نفسى اعذرك
او حتى اشوف
حجه سعادتك .. للمهانه
مش لاقى غير سلبيتك والاستكانه

فاكر زمان
يوم ما اتقابلنا فى الشوارع
شوفتك بطل
شوفتك مناضل
شوفتك مصارع

رافض تعيش مسلوب إرادتك
قابل تموت ... موت البطل
طب إيه حصل يمكن حسدتك
او نال مناله فيك الهطل

مستنى ليه
غيرك يأسس دولتك
ويذل فيك

وهو كاشف عورتك
رافع إيديك
سايبه يدنس جتتك
كأنك شهيد .. فاهم غلط

يا ابنى الشهيد نزل ايديه
ضرب العساكر ميت (100)قلم
ودمه ستر على عورتى
وبـ تانى ايد رفع العلم
يا ابنى الشهيد قال للجبابرة
الف(1000) لأ ومات بطل

ماتفوق بقى
ماتفوق بقى جاتك القرف
مش قادر ابص فى خلقتك
هدف الثورة خلاص انحرف
والبركه طبعاً حضرتك

خليك مفخد ع السرير
ياشعب واخد ع النطاعه
الوقفه يا ابنى فى الميدان
تحتاج لقلب فيه شجاعه

بتشتكى تكتيف ايديك
خايف ليموت من الجوع عيالك

ما تخلى ايدك تنفرد
راح تكتشف
تكتيف ايديك
وهم لخيالك

واخر كلامى لمصرى حر
شايف فى دم الشهدا
مصر  حرة بتتولد
اوعاك تفرط فى البلد
وفى التاريح
دم الشهيد
جسر وعليه راح تنسد

وتعدى يمه الانتصار
وتعدى يمه الانتصار

النصر للثورة
والمجد للشهدا الاحرار

ميعادنا 9/9
"لا للمحاكمات العسكريه للمدنين"